ಭಟ್ಕಳದ ಬೆಳಕೆಯ ಗ್ರಾಮೀಣ ವ್ಯವಸಾಯ ಸಹಕಾರಿ ಸಂಘದ 3.87 ಕೋಟಿ ವೆಚ್ಚದ ನೂತನ ಕಟ್ಟಡ ಮೇ 15 ಭಾನುವಾರದಂದು ಉದ್ಘಾಟನೆಗೊಳ್ಳಲಿದೆ

ಜಿಲ್ಲಾ ಸುದ್ದಿಗಳು 

ಭಟ್ಕಳ 

ಗ್ರಾಮೀಣ ವ್ಯವಸಾಯ ಸಹಕಾರಿ ಸಂಘ ಬೆಳಕೆ ಇದರ 3.87ಕೋಟಿ ವೆಚ್ಚದಲ್ಲಿ ನೂತನ ಕಟ್ಟಡದ ಉದ್ಘಾಟನಾ ಸಮಾರಂಭವೂ ಮೇ 15 ರಂದು ಶ್ರೀ ಕ್ಷೇತ್ರ ಕನ್ಯಾಡಿ ನಿತ್ಯಾನಂದ ನಗರ ಉಜಿರೆ ಧರ್ಮಸ್ಥಳದ ಪರಮಪೂಜ್ಯ ಶ್ರೀ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿಯವರ ಅಮ್ರತ ಹಸ್ತದಲ್ಲಿ ನೆರವೆರಿಸಲಿದ್ದಾರೆ ಎಂದು ಸಂಘದ ಅಧ್ಯಕ್ಷ ಮಂಜುನಾಥ ಲಚ್ಮಯ್ಯ ನಾಯ್ಕ ಅವರು ತಿಳಿಸಿದರು.ಅವರು ಗುರುವಾರದಂದು ಬೆಳೆಕೆಯ ಗ್ರಾಮೀಣ ವ್ಯವಸಾಯ ಸಹಕಾರಿ ಸಂಘದಲ್ಲಿ ಕರೆದ ಪತ್ರಿಕಾಗೋಷ್ಠಿಯಲ್ಲಿ ಕಟ್ಟಡ ಉದ್ಘಾಟನೆ ಕುರಿತು ವಿವರಿಸುತ್ತಾ ಮಾತನಾಡುತ್ತಿದ್ದರು.

‘ಹೊಸ ಸಹಸ್ರಮಾನದ ಉಡುಗೊರೆಯಾಗಿ ನಮ್ಮ ಸಂಘ ತಾಲೂಕಿನ ಬೆಳಕೆ ಗ್ರಾಮ ಪಂಚಾಯತ್ ಪ್ರದೇಶದಲ್ಲಿ ತನ್ನ ಸದಸ್ಯರಿಗೆ ಹಾಗೂ ಗ್ರಾಹಕರಿಗೆ ಆಧುನಿಕ ತಂತ್ರಜ್ಞಾನ ಯುಗಕ್ಕೆ ಅನುಗುಣವಾಗಿ ಸೇವೆಯನ್ನು ಸಲ್ಲಿಸುವ ಮಹತ್ವಾಕಾಂಕ್ಷೆಯ ಉದ್ದೇಶದೊಂದಿಗೆ ನೂತನ ಶೈಲಿಯಲ್ಲಿ ಸಂಪೂರ್ಣ ಹವಾನಿಯಂತ್ರಿತ ವ್ಯವಸ್ಥೆಯೊಂದಿಗೆ ಸುಸಜ್ಜಿತವಾದ ಕಟ್ಟಡವನ್ನು ನಿರ್ಮಾಣ ಮಾಡಲಿದ್ದೇವೆ. ಮಾರ್ಚ 25 2018 ರಂದುಮಾಜಿ ಶಾಸಕ ಮಂಕಾಳ ವೈದ್ಯ ಅವರ ಅವಧಿಯಲ್ಲಿ ಕಟ್ಟಡದ ಶಿಲಾನ್ಯಾಸವನ್ನು ಮಾಡಿದ್ದರು.1952 ರಲ್ಲಿ ಬೆಳಕೆ ಗ್ರೂಪ್ ಸೇವಾ ಸಹಕಾರಿ ಸಂಘ ಎಂಬ ಶಿರೋನಾಮೆಯೊಂದಿಗೆ ಅಬ್ಬಿಹಿತ್ಲುವಲ್ಲಿ ಸಂಘದ ಮೊದಲ ಕಚೇರಿಯು ಆರಂಭಗೋಂಡಿತು. ನಂತರ ಸೋಡಿಗದ್ದೆಯ ಮಹಾಸತಿ ದೇವಸ್ಥಾನ ಪಕ್ಕದ ಬಾಡಿಗೆ ಕಟ್ಟಡಕ್ಕೆ ಸ್ಥಳಾಂತರಗೋಂಡು ಕಾರ್ಯಾರಂಭಗೋಂಡಿತು. ಅಂದು ಸಂಘದ ಸಂಸ್ಥಾಪಕ ಅಧ್ಯಕ್ಷರಾಗಿ ದಿ. ಕೃಷ್ಣಪ್ಪ ವೆಂಕಟರಮಣ ನಾಯ್ಕ ಅಬ್ಬಿಹಿತ್ಲು ಇವರು ಕಾರ್ಯ ನಿರ್ವಹಿಸಿದ್ದರು. ಪ್ರಾರಂಭಿಕ ವರ್ಷದಲ್ಲಿ ಸಂಘದ ತನ್ನ ವ್ಯವಹಾರ ಗತಿಯನ್ನು ನಿಧಾನಗತಿಯಲ್ಲಿ ಇಡಬೇಕಾದ ವೇಳೆಯಲ್ಲಿ 1959ರ ಕೃಷಿ ಪತ್ತಿನ ಸಹಕಾರಿ ಸಂಘಗಳ ರಚನೆ ಕುರಿತು ವಿ.ಎಲ್.ಮೇಹ್ತಾ ಸಮಿತಿಯು ಸಲ್ಲಿಸಿದ ವರದಿಯ ಹಿನ್ನೆಲೆ ಮತ್ತು ಕರ್ನಾಟಕ ಸಹಕಾರಿ ಸಂಘಗಳ 1950ರ ಸಮಗ್ರ ಕಾಯ್ದೆ ಮತ್ತು ನಿಯಮಾವಳಿಗಳು ಜಾರಿಗೆ ಬಂದ ಹಿನ್ನೆಲೆ ಕಚೇರಿಯು ಪುನರ ರಚನೆಗೊಂಡು ಕಾರ್ಯನಿರ್ವಹಿಸುತ್ತಾ ಬಂದಿತು. ಭಾರತೀಯ ರಿಜರ್ವ ಬ್ಯಾಂಕ್ ಕೃಷಿ ಪತ್ತಿನ ಪುನಘಟನೆಯ ಯೋಜನೆ ಅನ್ವಯ 1976-77ರಲ್ಲಿ ಗ್ರಾಮೀಣ ವ್ಯವಸಾಯ ಸಹಕಾರಿ ಸಂಘ ಹೆಸರಿನೊಂದಿಗೆ ಪುನರ್ ಕಾರ್ಯಾರಂಭಗೋಂಡಿತ್ತು ಎಂದರು.10 ಹಳ್ಳಿಗಳ ಕಾರ್ಯವ್ಯಾಪ್ತಿಯಲ್ಲಿ ಬರುವ ನಮ್ಮ ಸಂಘವು ಹಿರಿಯ ಮುತ್ಸದ್ದಿಗಳು, ರಾಜಕೀಯ ಧುರೀಣರು ಹಾಗೂ ನಮ್ಮ ಸಂಘದ ಅಧ್ಯಕ್ಷರಾಗಿದ್ದ ಎಮ್. ಎಸ್. ನಾಯ್ಕ ಅವರು 1974ರಲ್ಲಿ ಆಯ್ಕೆಗೊಂಡಿದ್ದು ಅವರು ನಿರ್ದೇಶಕರ ಮಂಡಳಿಯ ಹಿರಿಯ ನಿರ್ದೇಶಕರ ಅವಧಿಯಲ್ಲಿ ಈಗಿರುವ ಹಾಲಿ ಸಂಘದ ಕಟ್ಟಡದ ಅಡಿಗಲ್ಲನ್ನು ಅಂದಿನ ಮಾಜಿ ಸಚಿವ ಎಸ್. ಎಮ್. ಯಾಯಾ ಹಾಕಿದ್ದು ಆಮೂಲಕ ಬಾಡಿಗೆ ಕಟ್ಟಡದಿಂದ ಸ್ವಂತ ಕಟ್ಟಡಕ್ಕೆ ಸ್ಥಳಾಂತರಗೊಂಡಿತು. ಅದೇ ರೀತಿ ಸತತ 30 ವರ್ಷಕ್ಕೂ ಅಧಿಕ ಕಾಲ ನಿರ್ದೇಶಕರಾಗಿ ಹಾಗೂ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ ಹಿನ್ನೆಲೆ ನೂತನ ಕಟ್ಟಡದ ಎರಡನೇ ಮಹಡಿಯಲ್ಲಿನ ಸಭಾ ಭವನಕ್ಕೆ ಎಮ್. ಎಸ್. ನಾಯ್ಕ ಸಭಾಭವನ ಎಂದು ಹೆಸರಿಡುವ ಮೂಲಕ ಅವರ ಸೇವೆಗೆ ಗೌರವ ಸಲ್ಲಿಸಲಾಗಿದೆ.

70 ವರ್ಷಗಳ ನಮ್ಮ ಸಂಘದ ಕಾರ್ಯಾವಧಿಯಲ್ಲಿ ಕಳೆದ 45 ವರ್ಷಗಳ ಅವಧಿಯು ಸಂಘಕ್ಕೆ ಒಂದು ಏಳು-ಬೀಳಿನ ಕಾಲವಾಗಿದ್ದರು ಅದಕ್ಕೆ ಎದೆಗುಂದದೆ ಕಾಲಕಾಲಕ್ಕೆ ಬದಲಾದ ಪರಿಸ್ಥಿತಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸುತ್ತಾ ಅಭಿವೃದ್ಧಿಯ ಮಟ್ಟವನ್ನು ಕಾಪಾಡಿಕೊಂಡು ಬಂದಿದ್ದೇವೆ. ಹಾಲಿ ಸಂಘದ ಅಧ್ಯಕ್ಷ, ಸಹಕಾರಿ ಧುರೀಣರಾದ ಮಂಜುನಾಥ ಲಚ್ಮಯ್ಯ ನಾಯ್ಕ 14 ವರ್ಷದಿಂದ ಆಡಳಿತ ಮಂಡಳಿಯಲ್ಲಿದ್ದು ಸತತ 11 ವರ್ಷಗಳ ಕಾಲ ಸಂಘದ ಅಧ್ಯಕ್ಷರಾಗಿ ಸಂಘದ ನಿರ್ದೇಶಕರ ಮಂಡಳಿಯ ಸಲಹೆ ಬೆಂಬಲದದೊಂದಿಗೆ ಉತ್ತಮ ಕೆಲಸ ನಿರ್ವಹಿಸಿಕೊಂಡು ಬರುತ್ತಿದ್ದಾರೆ. ಸಂಘ ವಿವಿಧ ರೀತಿಯ ಆರ್ಥಿಕ ಸರ್ವತೋಮುಖ ಅಭಿವೃದ್ಧಿಯನ್ನು ಹೊಂದಿ ಗಣನೀಯ ಪ್ರಮಾಣದಲ್ಲಿ ವ್ಯವಹಾರ ಹೆಚ್ಚಿಸಿಕೊಂಡಿದೆ.100 ಮಂದಿ ಪ್ರಾರಂಭದ ಸದಸ್ಯರ ಸಂಖ್ಯೆಯಿಂದ ಇಂದು 7289 ಮಂದಿ ಸದಸ್ಯರಾಗಿದ್ದಾರೆ. ಆರಂಭದ ರೂ. 200 ತಲಾ 2 ರೂ. ರಂತೆ ಬಂಡವಾಳದೊಂದಿಗೆ ಈಗ 3.79 ಕೋಟಿ ರೂ. ಶೇರು ಬಂಡವಾಳ ಹೊಂದಿದೆ. ಸದ್ಯ 52,55.92 ಕೋಟಿ ಒಟ್ಟು ಠೇವಣಿಗಳಿವೆ. ನಿವ್ವಳ ಲಾಭ 105.60 ಕೋಟಿ, 2 ಶಾಖೆ ಹಾಗೂ ಪ್ರಧಾನ ಕಚೇರಿಯಲ್ಲಿ 20 ಸಿಬ್ಬಂದಿಗಳು ಕೆಲಸ ನಿರ್ವಹಿಸುತ್ತಿದ್ದಾರೆ. ಒಟ್ಟು 5 ಬಾರಿ ಕೆ.ಡಿ.ಸಿ.ಸಿ. ಬ್ಯಾಂಕ್ ಶಿರಸಿಯಿಂದ ತಾಲೂಕಿನ ಉತ್ತಮ ಸಹಕಾರಿ ಸಂಘ, 6 ಬಾರಿ ರಾಜ್ಯ ಅಪೇಕ್ಸ ಬ್ಯಾಂಕನಿಂದ ಜಿಲ್ಲಾ ಮಟ್ಟದ ಉತ್ತಮ ಸಹಕಾರಿ ಸಂಘ ಪ್ರಶಸ್ತಿ ಭಾಜರಾಗಿದ್ದಾರೆ ಎಂದರು.

ಸಂಘದ ಭದ್ರತಾ ಕೋಣೆಯನ್ನು ಜಿಲ್ಲಾ ಉಸ್ತುವಾರಿ ಸಚಿವ ಹಾಗೂ ಸಮಾಜ ಕಲ್ಯಾಣ ಮತ್ತು ಹಿಂದುಳಿದ ವರ್ಗಗಳ ಕಲ್ಯಾಣ ಸಚಿವ ಕೋಟಾ ಶ್ರೀನಿವಾಸ ಪೂಜಾರಿ ಅವರು ಉದ್ಘಾಟಿಸಲಿದ್ದಾರೆ. ಆಡಳಿತ ಮಂಡಳಿಯ ಕಚೇರಿಯನ್ನು ಕಾರ್ಮಿಕ ಸಚಿವ ಹಾಗೂ ಕೆ.ಡಿ.ಸಿ.ಸಿ. ಬ್ಯಾಂಕ್ ಅಧ್ಯಕ್ಷ ಶಿವರಾಮ ಹೆಬ್ಬಾರ, ಎಮ್.ಎಸ್. ನಾಯ್ಕ ಸಭಾಭವನವನ್ನು ಶಾಸಕ ಸುನೀಲ ನಾಯ್ಕ, ಗೋದಾಮು ಉದ್ಘಾಟನೆಯನ್ನು ಕೆ.ಡಿ.ಸಿ.ಸಿ. ಬ್ಯಾಂಕ್ ಮಾಜಿ ನಿರ್ದೇಶಕ ಹಾಗೂ ಮಾಜಿ ಶಾಸಕ ಮಂಕಾಳ ವೈದ್ಯ, ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ಅಧ್ಯಕ್ಷ, ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷ, ಇಪ್ಕೋ ನವದೆಹಲಿ ನಿರ್ದೇಶಕ, ರಾಜ್ಯ ಸಹಕಾರಿ ಅಪೆಕ್ಸ ಬ್ಯಾಂಕ್ ನಿರ್ದೇಶಕ ಡಾ. ಎಂ.ಎನ್. ರಾಜೇಂದ್ರ ಕುಮಾರ ಅವರು ಆಡಳಿತ ಮಂಡಳಿಯ ಸಭಾಭವನ ಉದ್ಘಾಟನೆ ಮಾಡಲಿದ್ದು, ಸಂಘದ ಕಟ್ಟಡದ ಲಿಪ್ಟ ಉದ್ಘಾಟನೆಯನ್ನು ಮಾಜಿ ಶಾಸಕ ಜೆ.ಡಿ. ನಾಯ್ಕ ನಡೆಸಲಿದ್ದಾರೆ.ಮುಖ್ಯ ಅತಿಥಿಗಳಾಗಿ ಬೆಳಕೆ ಗ್ರಾಮ ಪಂಚಾಯತಿ ಅಧ್ಯಕ್ಷೆ ಶಾಂತಿ ಜೆ. ಮೊಗೇರ, ಸಹಕಾರ ಸಂಘಗಳ ಸಹಾಯಕ ನಿಭಂಧಕ ನಾಗಭೂಷಣ ಕಲ್ಮನೆ ಆಗಮಿಸಲಿದ್ದಾರೆ.

ಉದ್ಘಾಟನೆ ಕಾರ್ಯಕ್ರಮಕ್ಕೂ ಪೂರ್ವದಲ್ಲಿ ಪರಮಪೂಜ್ಯ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿಯವರನ್ನು ಹಾಗೂ ಅತಿಥಿಗಳನ್ನು ಕುಂಭ ಮೇಳದ ಮೆರವಣಿಗೆಯ ಮೂಲಕ ಸೋಡಿಗದ್ದೆ ಕ್ರಾಸನಿಂದ ಕರೆತರಲಾಗುವುದು.ಬೆಳಿಗ್ಗೆ 10.40. ಕ್ಕೆ ನೂತನ ಕಟ್ಟಡದ ಉದ್ಘಾಟನೆ ನಂತರ ಸಭಾ ಕಾರ್ಯಕ್ರಮ, ಮಧ್ಯಾಹ್ನ 1 ರಿಂದ 3 ತನಕ ಭೋಜನ ಕೂಟ ನಂತರ ಸಂಜೆ 6 ಗಂಟೆಗೆ ಝೇಂಕಾರ ಮೇಲೋಡಿಸ್ ಭಟ್ಕಳ ತಂಡದವರಿಂದ ‘ವೈವಿಧ್ಯಮಯ ಸಂಗೀತ ಕಾರ್ಯಕ್ರಮ’ ರಾತ್ರಿ 9.30 ರಿಂದ ಸಾಲಿಗ್ರಾಮ ಮೇಳದವರಿಂದ ‘ಯಕ್ಷಗಾನ ಬಯಲಾಟ’ ನಡೆಯಲಿದೆ ಎಂದರು.ಈ ಸಂದರ್ಭದಲ್ಲಿ ಸಂಘದ ಉಪಾಧ್ಯಕ್ಷ ನಾರಾಯಣ ಜಟ್ಟ ನಾಯ್ಕ, ನಿರ್ದೇಶಕ ಮಂಡಳಿಯ ಸದಸ್ಯರು ಉಪಸ್ಥಿತರಿದ್ದರು.ಸಂಘದ ಮುಖ್ಯ ಕಾರ್ಯನಿರ್ವಾಹಕ ಅಣ್ಣಪ್ಪ ಎನ್. ನಾಯ್ಕ ಸ್ವಾಗತಿಸಿದರು.