ಬೈಕ್ ನಿಯಂತ್ರಣ ತಪ್ಪಿ ಮಹಿಳೆ ದುರ್ಮರಣ

ರಾಜ್ಯ ಸುದ್ದಿಗಳು 

ದೇವನಹಳ್ಳಿ

ತಾಲೂಕಿನ ಜಿಲ್ಲಾಡಳಿತ ಭವನದ ಕೂಗಳತೆ ದೂರದ ಕುಂದಾಣ ರಸ್ತೆಯಲ್ಲಿ ಬೈಕ್ ನಿಯಂತ್ರಣ ತಪ್ಪಿ ಮಹಿಳೆಯೊಬ್ಬಳು ಸಾವನ್ನಪ್ಪಿರುವ ಘಟನೆ ನಡೆದಿದೆ. ಸುಗುಣ.ಎನ್.ಎಂ (೨೫) ಸಾವನ್ನಪ್ಪಿರುವ ದುರ್ದೈವಿಯಾಗಿದ್ದಾರೆ.

ಕುಂದಾಣ ಅಂಚೆ ಕಚೇರಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ನೆರಗನಹಳ್ಳಿ ಗ್ರಾಮದ ಸುಗುಣ.ಎನ್.ಎಂ. ಆಕ್ಸಸ್ ಬೈಕ್ ಸಂಖ್ಯೆ ಕೆ.ಎ.೫೩ ಇಜೆಡ್ ೫೬೯೪ ನಂಬರಿನ ಬೈಕ್‌ನಲ್ಲಿ ಒಬ್ಬರೇ ಕುಂದಾಣ ಕಡೆಯಿಂದ ಚಪ್ಪರದಕಲ್ಲು ಕಡೆಗೆ ಚಲಾಯಿಸಿಕೊಂಡು ಬರುವ ವೇಳೆ ರಸ್ತೆ ಮಧ್ಯೆ ಬೈಕ್ ನಿಯಂತ್ರಣ ತಪ್ಪಿ ರಸ್ತೆಯಲ್ಲಿ ಅಪಘಾತಕ್ಕೀಡಾಗಿ ತಲೆಗೆ ಹೆಚ್ಚು ಪೆಟ್ಟು ಬಿದ್ದಿದ್ದರಿಂದ ಕಿವಿಯಲ್ಲಿ ರಕ್ತಸ್ರಾವವಾಗಿ ಕ್ಷಣಾರ್ಧದಲ್ಲಿಯೇ ಸಾವನ್ನಪ್ಪಿದ್ದಾಳೆ.

ವಿಶ್ವನಾಥಪುರ ಪೊಲೀಸರ ತಂಡ ಘಟನಾ ಸ್ಥಳಕ್ಕೆ ದೌಡಾಯಿಸಿದ್ದು, ಘಟನೆಯ ಹಿನ್ನಲೆಯನ್ನು ಪಡೆಯಲಾಗಿದೆ. ಸುಗುಣ.ಎನ್.ಎಂ. ಪತಿ ವೇಮಗಲ್ ನಿವಾಸಿ ಗೌತಮ್ ಇತ್ತೀಚೆಗಷ್ಟೇ ಪ್ರೀತಿಸಿ ಮದುವೆಯಾಗಿದ್ದರು ಎನ್ನಲಾಗುತ್ತಿದ್ದು, ದಂಪತಿಗಳಿಬ್ಬರು ಕುಂದಾಣ ಗ್ರಾಮದಲ್ಲಿ ನಾರಾಯಣಪ್ಪ ಎಂಬುವವರ ಮನೆಯಲ್ಲಿ ಬಾಡಿಗೆಗೆ ವಾಸಿಯಾಗಿದ್ದರು.
ಘಟನೆಗೆ ಸಂಬಂಧಿಸಿದಂತೆ, ವಾಹನ ಚಲಾಯಿಸುವ ಸುಗುಣ.ಎನ್.ಎಂ. ಹೆಲ್ಮೆಟ್ ಧರಿಸದಿರುವುದು ಸಾವಿಗೀಡಾಗಲು ಮುಖ್ಯ ಕಾರಣವಾಗಿದೆ. ಘಟನಾ ಸ್ಥಳದಲ್ಲಿ ಹೆಚ್ಚು ಜಮಾಯಿಸಿದ್ದು, ಕೆಲ ಕಾಲ ಟ್ರಾಫಿಕ್ ಜಾಮ್ ಆಗಿತ್ತು. ಘಟನೆಗೆ ಸಂಭವಿಸಿದಂತೆ ವಿಶ್ವನಾಥಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪತಿ ಗೌತಮ್ ಹಾಗೂ ಸಂಬಂಧಿಕರ ನೋವು ಮುಗಿಲು ಮುಟ್ಟಿತು.