ರಾಜ್ಯ ಸುದ್ದಿ 

ಕುಮಟಾ: ಪಟ್ಟಣದ ಅಗ್ನಿಶಾಮಕ ಠಾಣೆಯ ಹಿಂಭಾಗದಲ್ಲಿನ ದರ್ಶನ ದಾಮೋದರ ವೈದ್ಯ ಎನ್ನುವವರ ಮನೆಯ ಬಳಿ ಭಾನುವಾರ ರಾತ್ರಿ ಕಾಣಿಸಿಕೊಂಡ 12 ಫೀಟ್ ಉದ್ದದ ಬೃಹತ್ ಗಾತ್ರದ ಹೆಬ್ಬಾವೊಂದನ್ನು ಉರಗ ಪ್ರೇಮಿ ಪವನ ನಾಯ್ಕ ಕಲಭಾಗ ಸುರಕ್ಷಿತವಾಗಿ ಹಿಡಿದು, ಕಾಡಿಗೆ ಬಿಡುವಲ್ಲಿ ಯಶಸ್ವಿಯಾಗಿದ್ದಾರೆ.

ತಡ ರಾತ್ರಿ ಬೃಹತ್ ಗಾತ್ರದ ಹೆಬ್ಬಾವನ್ನು ಗಮನಿಸಿದ ವೈದ್ಯರ ಮನೆಯವರು ಗಾಬರಿಗೊಂಡು ತಕ್ಷಣವೇ ಸಾಮಾಜಿಕ ಕಾರ್ಯಕರ್ತ ಶ್ರೀಧರ ಕುಮಟಾಕರ ಅವರಿಗೆ ಮಾಹಿತಿ ನೀಡಿದ್ದರು. ಈ ಬಗ್ಗೆ ಶ್ರೀಧರ ಕುಮಟಾಕರ ಉರಗ ಪ್ರೇಮಿ ಪವನ ನಾಯ್ಕ ಕಲಭಾಗ ಅವರನ್ನು ಸಂಪರ್ಕಿಸಿ, ಕೂಡಲೇ ಸ್ಥಳಕ್ಕೆ ತೆರಳಿದ್ದು, ಸ್ಥಳೀಯರ ಸಹಕಾರದಿಂದ ಕಾರ್ಯಾಚರಣೆ ನಡೆಸಿ, ಹೆಬ್ಬಾವನ್ನು ಸರಕ್ಷಿತವಾಗಿ ಹಿಡಿದು ಕಾಡಿಗೆ ಬಿಟ್ಟಿದ್ದಾರೆ. ಇದು ಹೆಣ್ಣು ಹೆಬ್ಬಾವಾಗಿದ್ದು, 31 ಕೆ.ಜಿ.ಗೂ ಅಧಿಕ ಭಾರವಿದೆ ಎಂದು ಉರಗ ಪ್ರೇಮಿ ಪವನ ನಾಯ್ಕ ಕಲಭಾಗ ಮಾಹಿತಿ ನೀಡಿದ್ದಾರೆ.

ಸಕಾಲಕ್ಕೆ ಸ್ಪಂದಿಸಿ, ಹೆಬ್ಬಾವನ್ನು ಸುರಕ್ಷಿತವಾಗಿ ಕಾಡಿಗೆ ಬಿಡುವಲ್ಲಿ ಯಶಸ್ವಿಯಾದ ಪವನ ನಾಯ್ಕ ಕಲಭಾಗ ಹಾಗೂ ಸಾಮಾಜಿಕ ಕಾರ್ಯಕರ್ತ ಶ್ರೀಧರ ಕುಮಟಾಕರ ಅವರ ಕಾರ್ಯಕ್ಕೆ ಸ್ಥಳೀಯರು ಹಾಗೂ ವೈದ್ಯರ ಕುಟುಂಬದವರು ಮೆಚ್ಚುಗೆ ವ್ಯಕ್ತಪಡಿದ್ದಾರೆ.