ಗೋಕರ್ಣ: ದೇವರ ದರ್ಶನಕ್ಕೆ ಬಂದ ವ್ಯಕ್ತಿ ಕೋಟಿತೀರ್ಥದಲ್ಲಿ ಮುಳುಗಿ ಸಾವು

ಜಿಲ್ಲಾ ಸುದ್ದಿಗಳು

ಗೋಕರ್ಣ:

ಬೆಂಗಳೂರಿನಿಂದ ಗೋಕರ್ಣ ಆತ್ಮಲಿಂಗ ದರ್ಶನಕ್ಕೆ ಬಂದಿದ್ದ ವ್ಯಕ್ತಿ ಕೋಟಿತೀರ್ಥದಲ್ಲಿ ಆಕಸ್ಮಿಕ ಕಾಲು ಜಾರಿ ಬಿದ್ದು ಮೃತಪಟ್ಟಿದ್ದಾರೆ.

ನೀರಿನಲ್ಲಿ ಮುಳುಗಿ ಮೃತಪಟ್ಟವರು ಬೆಂಗಳೂರಿನ ನಿವಾಸಿ ಕೆ.ಎಸ್ ಕಮಲಾಕ್ಷ (67) ಎಂದು ಗುರುತಿಸಲಾಗಿದೆ. ಐವರು ಕುಟುಂಬದ ಸದಸ್ಯರೊಡನೆ ಗೋಕರ್ಣದಲ್ಲಿ ಧಾರ್ಮಿಕ ಕಾರ್ಯದ ನಿಮಿತ್ತ ಬಂದಿದ್ದರೆಂದು ಸ್ಥಳೀಯರು ಮಾಹಿತಿ ನೀಡಿದ್ದಾರೆ.

ಮಳೆಗಾಲವಾದ್ದರಿಂದ ಕೋಟಿತೀರ್ಥದ ಮೆಟ್ಟಿಲುಗಳು ಜಾರುತ್ತಿದ್ದು, ಸ್ನಾನ ಮಾಡಲೆಂದು ಅವರು ಮಟ್ಟಿಲಿಳಿಯುತ್ತಿದ್ದಾಗ ಆಕಸ್ಮಿಕವಾಗಿ ಜಾರಿಬಿದ್ದು, ತೀರ್ಥದಲ್ಲಿ ಮುಳುಗಿ, ಮೃತಪಟ್ಟಿದ್ದಾರೆ. ಇವರು ನೀರಿಗೆ ಇಳಿಯುವ ಸಂದರ್ಭದಲ್ಲಿ ಸ್ಥಳೀಯರು ಅಲ್ಲಿ ಜಾರುತ್ತದೆ ಆ ಕಡೆಗೆ ಹೋಗಬೇಡಿ ಎಂದು ಎಚ್ಚರಿಕೆಯನ್ನು ಸಹ ನೀಡುತ್ತಿರುವಾಗಲೇ ಅವರು ನೀರಿಗಿಳಿಯುವ ಪ್ರಯತ್ನ ಮಾಡಿದ್ದಾರೆ ಎನ್ನಲಾಗಿದೆ.

ತಕ್ಷಣ ಮಾಹಿತಿ ಪಡೆದ ಗೋಕರ್ಣ ಠಾಣೆ ಪೊಲೀಸರು ಸ್ಥಳಕ್ಕಾಗಮಿಸಿ, ಕೋಟಿ ತೀರ್ಥದಲ್ಲಿ ಶೋಧ ಕಾರ್ಯ ನಡೆಸುವ ಮೂಲಕ ಶವವನ್ನು ಮೇಲಕ್ಕೆತ್ತಿದ್ದಾರೆ. ಸ್ಥಳೀಯರ ಸಹಕಾರದೊಂದಿಗೆ ಆಂಬುಲೆನ್ಸ್ ಮೂಲಕ ಮೃತ ವ್ಯಕ್ತಿಯನ್ನು ಆಸ್ಪತ್ರೆಗೆ ಸಾಗಿಸಲಾಗಿದೆ. ಪೊಲೀಸರು ಮುಂದಿನ ಕಾರ್ಯಾಚರಣೆ ಕೈಗೊಂಡಿದ್ದಾರೆ.